ما هو رايكم بالميتسوبيشي l200

الميتسوبيشي بوجة عام موتر ياباني ياباني لك وللزمن 
لكن حط في بالك صرفية البنزين وقلة المواصفات والراحة

معنا وحدة ٢٠٠٥ 
مشتريها الوالد وكالة في وقتها
حتى الان وصلت حول ٤٥٠ الف 
موتر كد ومكدة
بدت المكينة تطلع دخان وتنقص زيت علبتين 
وصحن الكلتش خرب مره 
والمكيف باقي بفريون وكالته وبارد برودة معقولة .. بس مو زي زمان كان ثلج
خربت طرمبة البنزين
حاجات بسيطة 
غيرنا سير التايمن مرتين 
واكثر صيانتها بالوكالة .. رغم انها صلخ واسعارهم دبل

بس السيارة تكد وكفو

انا صاحب ميتسوبيشي ال200 المميزات :

- عزم و قوة ممتازه
- اليسارة حمار مكدة و كرف
- سعر مناسب جداً مقارنة الوانيتات الثانية
- الداخلية واسعة وهي الاوسع في الوانيتات
- قطع الغيار موب مثل المنتشر بين الناس انها غالية و نادرة بالعكس متوفرة عند الوكيل و السعر جيد

العيوب :

- الصندوق صغير ( في الغمارتين ) خصوصاً الخليجي
- صرفية البنزين عالية شوي
- قلة المواصفات ( خصوصاً في الخليجي )


الزبدة اذا نويت على ال200 انتبه الخليجي لا تسومه بريال ( سعودي ولا تفكر)
انا طبيت في الخليجي لرخص سعره لاني اخذه للشغل فقط و بصراحة ما ندمت
اذا ما يهمك المواصفات استخير و توكل على الله

سيارة كفو وعملية وكرف ما تقول شي 
البنزين الفل حقها ب 90 اذا فاضي التانكي اخضر 
قطع الغيار الناس مبالغين في اسعرها ولا هي معقولة 
الصندوق الوزن الاقصى لتحميل 1000 كيلو للغمارة 
ويتميز الصندوق ب مواصير ع الاطراف لربط الحبال 
من اي مكان تبغا عكس الونيتات الثانية 
مكاينها نفس مكاين مديلات القديمة يعني فيها من قوة القديم 
والله يبارك لك مقدما 

مالاحظتو l200 صار دودج رام وش السالفة

من واقع تجربه لموديل 2015 تماتيك دبل اليك عزيزي مقارنه سريعه بينها وبين الهايلوس (بحكم شعبيته وانتشاره )

السياره كاستخدام شخصي ما تصلح لك ابدا بالرغم من انها سياره لا يعلى عليها في المتانه وجودة التصنيع والعمر الافتراضي الطويل ولكن استهلاكها للبنزين عالي - السياره مطبها قاسي جدا - مراتبها غير مريحه ابدا - السياره ياعزيزي باختصار مصنوعه للشقا .. خذها على يمناك للاعمال الشاقه وللرحلات البريه او الجبليه وتتفوق على مثيلاتها بمراحل من هالناحيه ..

قطع غيارها بالنسبه للاكسسوار غالي :: لقيت الاصطب الخفلي الايسر ب850 ريال بعد الخصم !! اما الامور الاستهلاكيه للامانه ما قد غيرت فيها شي غير الفحمات واتوقع شريت نوع ياباني وسعره معقول الاصلي تايلندي وسعره على ما اذكر غالي شوي

بالرغم من عدم اقتناعي الشخصي

عند عماد الدين جديدة اصفار ديزل غمارتين دبل
ب٧٠ الف كاش من دون الضريبه
سعر معقول للي محتاج موتر للتحميل و الكرف

السلام عليكم يالربع لاهنتو وش رايكم بالميستوبيشي 2018 وانيت غمارتين دبل ديزل كيف استخدامها

هل المرتبه الخلفيه وسيعه مثل الهايلكس والنافارا؟؟

كيف عزمها في الرمال

من واقع تجربة
عندي 2017 بانزين حتى الآن ماشية 70 الف
السيارة فيها مميزات وعيوب
المميزات السيارة فيها رحابة من الداخل ما تلاقيها في مثيلاتها
التكييف جيد العضلات ممتازة والسيارة متماسكة
الرساوة لا يعلى عليها
اما العيوب استهلاك الوقود عالي جداً في الخطوط ومعقول في البلد والمسافات القصيرة
في حنه في المكينة
وأيضاً واجهت عيوب مصنعية منها صوت يظهر أحيانا في علبة الباور
وصوت من ناحية القزوز من بعد ما مشة 50 الف وعند الفحص قال لي المكنيكي ان هذا عيب فيها
هذا من واقع تجربة والله على ما اقول شهيد

ايش رايكم ميتسوبيشي غماره L200 موديل 2010
تنفع فود ترك

ايش رابكم في مستبيشي ديزل ٢٠٠١

ايش رابكم في مستبيشي ديزل ٢٠٠١

اقدر الهم مكيف للعايدي

ارهم
وش رايكم

ما ادري هذي الشركة بتتطور . مقاعد قاسية . داخلية مافيها اي جماليات

كيف استخدام ٢٠٢٣