أضف سؤال أو موضوع جديد          

اختفاء نتعة قير الباجيرو بعد تغيير الزيت

up 14 down 0
nasser1430 776
قبل 2 أسبوع و 2 يوم



السلام عليكم ورحمة الله وبركاته ... صباح / مساء الخير والمسرات 

بفضل الله ومِنته سبحانه وتعالى .. تم تغيير زيت القير لموتري باجيرو 2016 - مكينة 3500
على ممشى 40 الف حسب ما هو موصى به من الشركة الأُم ميتسوبيشي .. نوع الزيت 
ATF SP III الاصلي ( حسب توصيات الشركة ) . 

تغيير الزيت بجهد شخصي في حوش البيت بادوات بسيطة ومتوفرة ( مفك 17 / محقان زيت )
طبعاً قبلها رحت لكذا مشحمة و ورشة اغلبهم يقول 100 ريال والشغلة اسهل من تغيير زيت
المكينة بكثير .. مجرد فك السره واترك الزيت ينزل على راحته .. بعدها شغل الموتر وادعس بنزين 
على ضغط منخفض 1,5 لمدة تقل عن الدقيقة بشكل متقطع يعني مرة تدعس بنزين ومرة تخفف 
الدعسة حتى تنزل اكبر كمية زيت ممكنة وخصوصاً من الطنجرة او ما تسمى البطيخة .. بعدها 
سكرت السره وعبيت 4,5 لتر زيت وطلع العيار بعد تجربة السيارة مضبوط .

طبعاً تغيير الزيت مو السبب الرئيسي لطرحي للموضوع .. لكن كان عندي مشكلة في التعشيق
وهي عبارة عن نتعه او تفويته بسيط جداً من النمره الثانية للثالثة تظهر في حالة واحدة فقط اذا
رحت مشوار ثم وقفت السيارة لمدة من 10 الى 15 دقيقة وبعدها شغلت ومشيت تظهر المشكلة
ولا يشعر بها الا السائق وتحصل مره واحدة فقط مهما طال المشوار او الممشى .

**وبعد تغيير الزيت الحمد والشكر لله اختفت المشكلة تماماً ورجع القير وكالة .. فحبيت أنقل
تجربتي لكم يمكن يكون عند أحدكم أو واحد تعرفونه عنده نفس المشكلة وأتوقع تنفع للسيارات
كلها ولعلها تكون هي الحل الغير متوقع بدل بهذلت الورش وتحايلهم**

**ملاحظة / ممكن تخطر في أذهان كثير من الاخوان >> ليه ما غيرت فلتر زيت القير ؟!؟! 
السبب لاني مريت الوكالة وسألت المهندس والمشرف المباشر على الصيانة  وقال لي نصاً :-
(( انهم ما يغيرون فلتر زيت القير على صيانة الـ 40 ألف كيلو الا اذا طلب العميل )) وانه ما يتغير
الا على صيانة متأخرة تقريباً على 80 ألف كيلو او أكثر .. ولا ضرر في ذلك بإذن الله وماشين
على هالطريقة سنوات كثيرة ولا توجد شكاوى او ملاحظات منهم او من العملاء ، على أن تكون
الصيانات في قتها أو قبلها عند الحاجة بالكمية وبالقطع والمواد الأصلية ( وكالة ) .

يا إخوان دعوة طيبة منكم في ظهر الغيب لي ولوالدي تكفيني .. دمتم بحفظ الله ورعايته .  







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


ماله داعي تشغل السيارة وهي بدون زيت قير

أما التغيير في البيت شيء أشكرك عليه

وأيضا سيارة هيونداي النترا ، تغييرها سهل جدا أسهل من تغيير زيت المكينة

المهم عند تغيير أي زيت ضع وعاء لجمع الزيت وقم بقياس الكمية التي نزلت وضع نفسها ، لأن زيادة الزيت أو نقصه يؤثر على آداء القير


up 1 down 1
anosi 1099
قبل 2 أسبوع و 2 يوم



حي الله اخوي anosi
عارف القصد من كلامك بالنسبة لتشغل السيارة كان لمدة بسيطة وانا مفرغ الزيت انه يضر القير 
لكن يصير فيه مضره او تلف للكلتشات اذا عشقت القير  بدون زيت .

وبالنسبة لقياس كمية الزيت اكيد اني حطيت وعاء بلاستيك كبير وفرغت الزيت في علب سعة 1 لتر 
وطلع عندي 4,5 علبة نزلت من القير ... حتى لا ازود ولا انقص الكمية .

والزيت حطيته في العلب حفاظاً على عدم سكبه في مجاري الصرف الصحي ( اعزكم الله ) 
او سكبه في غير مناسب مثل الشارع وتضرر الناس منه 


up 4 down 0
nasser1430 776
قبل 2 أسبوع و 2 يوم



ما شاء الله زيت ميتسوبيشي ممتاز atf sp iii هو نفسه زيت قير الآكسنت حصلته في وكالة الهونداي علبة زرقاء ب٥٥ ريال لتر واحد رحت عند وكيل المتسوبيشي وحصلته نفس العيار AtF sp iii ٥ لتر ب١١٠ ريال والحين ماشي عليه ٢٠ الف وما عليه ملاحظات الحمدلله


up 2 down 0
moathqaisiyah 168
قبل 2 أسبوع و 2 يوم



حياك الله اخوي moathqaisiyah 
صحيح كلامك .. حتى نفس موظف ميتسوبيشي أكد لي الكلام 
وقال ان كثير من اصحاب الهيواندي وغيرهم يأخذون نفس الزيت حق ميتسوبيشي 
لانه اجود وأرخص 5 لتر جالون كبير بـ 105 ريال بينما حق الهيواندي بـ 275 ريال 


up 1 down 0
nasser1430 776
قبل 2 أسبوع و 2 يوم



والهدف الرئيسي مو جودة الزيت وسعره المعقول مقارنة بغيره 
لكن تغيير الزيت قد يكون حل غير متوقع لنتعة او تفويتت التعشيق 
مثل ما ذكرت في موضوعي .. والله من وراء القصد 


up 1 down 0
nasser1430 776
قبل 2 أسبوع و 2 يوم



حياك موضوع تشكر عليه
بالنسبه للزيت القديم كثير من الناس يتورط فيه
مايدري وين يوديه
الحل توديه للبنشري وياخذه منك
ويقال ماني متاكد
انك تقدر تبيعه على البنشري ب3او5ريال
نفس سالفة البطاريات تبيعها للبنشري مستعمله



up 0 down 1
d7ooom777 821
قبل 2 أسبوع و 2 يوم



يعطيك الف عافية على هذي التجربة الطيبه ويكفي انك نقلت
تجربتك وانت الي مسوي كل شي بيدك هنا نستفيد ميه بالميه
انا اذكر بسيارتي القديمة اكورد ٢٠٠٨
رحت ل اوتو سيرفس وقالي عندنا جهاز يشفط زيت القير بالكامل
واذكر طلب مني ١١ علبة وانا كنت اغيرة قبل ٣ علب اذا فكيت الصرة
على العموم تجربتك افادتنا كثير جزاك خير
ورحم الله والديك .


up 0 down 0
سبحان الله 7787 110
قبل 2 أسبوع و 2 يوم



جزاك الله خير*


up 0 down 0
سبحان الله 7787 110
قبل 2 أسبوع و 2 يوم



** حياك الله اخوي d7ooom777 .. لا شكر على واجب  
فعلاً هذا اللي فكرت فيه اني اودي الزيت القديم للمشحمة 
سواءاً ابيعه او ياخذه بدون مقابل .. اهم شيء نحافظ على بيئتنا نظيفة 

** حياك الله اخوي سبحان الله 7787 .. والله يرحم والديك ومن يقرأ 
وكلامك صحيح القير في اغلب السيارات يحتوي على عدد لترات اكثر من اللي ينزل من الكرتير 
لان الباقي يكون في الطنجره اكثر شيء وطرمبة الزيت ومخ القير والكلتشات واجزاء القير العديدة 

والخطه الجايه باذن واحد احد اغير زيت القير كامل بالطريقة اللي ذكرت .. وجزاك الله خير 


up 0 down 0
nasser1430 776
قبل 2 أسبوع و 2 يوم



وحبيت اوضح في ردي السابق على الاخ moathqaisiyah وعلشان ما يكون فيه ضرر على اي شخص يغير زيت القير 
من زيت وكالة ميتسوبيشي ان سيارات هيواندي الكورية لها زيت مخصص من المصنع نفسه وهي بالعيارات التالية :- 
اما  MICHANG  ATF SP-IV
او   NOCA ATF SP-IV
او   SK ATF SP-IV 

الاصلية من وكالة هيواندي 


up 0 down 0
nasser1430 776
قبل 2 أسبوع و 2 يوم



توي مغيرة تقريباً عبى لي ٥ لتر الا شي بسيط 
بغيت اسألك بحكم تجربتك هل الباجيرو ترتفع حرارته بالزحمة ؟ 



up 1 down 0
asooo 8
قبل 2 أسبوع و 2 يوم



حياك الله اخوي asooo

الفضل لله دخلت زحمات .. وطعست فيه مع مراقي خفيفة الى متوسطة 
ولا عمري اشتكيت من شيء اسمه حرارة ... لا مكينة ولا قير .

لكن بعض اللي جربوه ما ادري وش وضع الحرارة او سببها بسياراتهم 


up 0 down 0
nasser1430 776
قبل 2 أسبوع و 2 يوم



يعطيك العافية اخ ناصر صحيح شي غريب ناس وناس مع تشابه طريقة الاستخدام 



up 1 down 0
asooo 8
قبل 2 أسبوع و 2 يوم



الأخ nasser1430
تجربتك رائعة

وبخصوص الزيت متوافق تماما مع قيور الهيونداي 4 نمر ، ATF SP III ، مثال الإلنترا القديمة قبل 2012 والآكسنت قبل 2014 الدفعة الأولى ، لكن سيارات هيونداي الي قيورها 6 نمر يتوافق معها زيت ATF SP IV مثل النترا سوناتا و حتى جينسس ، لكن الآكسنت نوع الزيت بعد موديلات 2014 هو ATF CVT ، وقبل القير ال CVT ، كان ممكن زيت ميتسوبيشي ATF SP III ، وسبق أن جربته مرتين على آكسنت 2012 الشكل الجديد وللحين ماشية فوق ال 300 ألف والقير ممتاز جدا جدا


أما بخصوص الحرار في الباجيرو حسب تجربتي ل 3.8 في طلوع عقبة ، سخن القير وأشتغلت لمبة تسخين القير ، ونفس المكان أطلع فيه يوميا بسيارتي النترا ولا مشكلة ، ممكن قيرها يسخن ولا يوجد فيه حساس ؟؟ ، لكن الباجيرو 3.8 ، تفاجأت بتسخين القير ، وممكن لقائد السيارة دور ساهم في تسخين القير حيث كانت السيارة جديدة أقل من 10 آلاف ممشاها وهو يقودها بهدوء ، أما أنا الحقيقة أطلع بسيارتي الالنترا مسرع في هذه العقبات ، لذلك فقدت الثقة في 3.8 باجيروا

ولكن بعضهم متعصب لنوع سيارته ولا يرضى يسمع مثل هذا الكلام ، فأتمنى تقبله بصدر رحب


up 3 down 0
anosi 1099
قبل 2 أسبوع و 2 يوم



بارك الله فيك اخوي anosi ... وجزاك الله ورحم الله والديك على توضيحك الوافي الكافي عن نوع زيت القير ومناسبته لسيارات هيواندي

وكلامك على متمه ... ولا تعصب ولا حاجة نفداك .. المقصد اننا نفيد بعض من خلال تجاربنا .. و ما يخص ارتفاع حرارة المكينة
عن النصف وظهور لمبة حرارة القير للباجيرو فأنا قرأت كم موضوع ولو كانت قليلة عن هالمشكلتين وأنا والله لا اعلم قد يكون عيب مصنعي 
او خطأ في المواصفات والمقاييس او لسبب غير معروف .. لكن دام السيارة ماشيه معنا على بركة وتوفيق رب العالمين فهذا هو المهم .



up 0 down 0
nasser1430 776
قبل 2 أسبوع و 2 يوم



رابط لعشاق باجيرو في السعودية
https://t.me/pajerogrop

تليجرام
لتبادل الخبرات 


up 0 down 0
shotaim
قبل 2 أسبوع